Fəaliyyəti dayandırılmış Azərbaycan Beynəlxalq Universitetinin rektoru, hazırda Fransada mühacirətdə olan Elşad Abdullayev hazırda həbsdə olan iş adamı Arzu Kazımovla söhbətinin audioyazısını yayıb. Elşad Abdullayev “Azadlıq”a açıqlamasında bildirib ki, Arzu Kazımovla bu söhbəti 2005-ci il aprel ayının 1-də olub. Mövzu təbii ki, Mahir Abdullayevdir. Elşad Abdullayevlə Arzu Kazımovun söhbətinin stenoqramını təqdim edirik:
Ramil Usubov əlini tuşlayaraq Zahid Dünyamalıyevə tapşırıq verdi ki…
Elşad Abdullayev: Arzu, Mahirin oğurlanmasindan 17 ay keçir, pulunu da almısınız, nə xəbər var? Bəs siz bilmirsiniz ki, bu qədər pulu adama bağışlamaq olmaz? Mahirin vəziyyəti nə yerdədir, nə xəbər var? Mənə ya hə, ya da yox de. Əgər başına bir iş gəlibsə bilək, mənə düz danış, elə bilərik ki, Qarabagda həlak ölüb, gedib qırxını verək.
Arzu Kazımov: Elşad müəllim, sabah daxili işlər nazirinin müavini Zahid Dünyamalıyevlə görüşək, konkret qərar qəbul edək. Mənə verdiyin pula görə narahat olma, heç kim heç kimin hesabını yeyə bilməz, başımla cavabdehəm.
E.A: Məni prezidentin əmisi akademik Aqil Əliyev və Daxili Işlər naziri Ramil Usubov aldadıb, mən onları ağsaqqal bilib sizlərə etibar etmişəm, yoxsa heç bir vaxt sizə inanmazdım. Ramil Usubov əlini tuşlayaraq Zahid Dünyamalıyevə tapşırıq verdi ki, Elşad müəllimin qardaşını qardaş kimi axtarmaq lazımdır. Elşad müəllim də rektor adamdır nə lazımdır edəcəkdir, sizə yardım edəcəkdir ki, Mahiri tapaq.
A.K: Zahid müəllim deyir ki, darıxmayın, Mahirin işi həll olunacaq.
E.A: Necə darıxmayaq, pulunuzu almısınız, 17 aydır ki, Mahiri qaytarmırsınız! Qoy Zahidin oğlu 17 ay evə gəlməsin, bu ona necə təsir edər?! Mahirin ailəsi, uşaqları çox əziyyət çəkirlər. Hələ bu boyda haqq-hesaba baxmayaraq Zahid Dünyamalıyev bizim ətrafımızda gündə bir tor qurur, oyun qurur, üstümə gündə bir dələduz göndərir. Gah Telman, gah Nüşabə-Şəmistan, gah Əli Zəngilanski, gah “Qarbaçov”, gah Fikrət, gah Akif və s. üstümə göndərir. Öz qəzetlərində əleyhimə həqiqətə uyğun olmayan nağıllar yazdırır. Zahidə denən generallığına salıb belə şeylərlə məşğul olmasın, özünü hörmətdən salmasın, erməni generalları bizim torpaqlarımızı işğal edir, bizim generallar da öz vətəndaşlarını oğurlayıb satır, ayıb olsun sizlərə, bu xaqın çörəyini yeyirsiniz özünə də tüprürsünüz, ayıbdır! Mənim üstümə gələnlər “beş şirvanlıq” “kamikadzelərdir”, pəhləvanlardır.
A.K: Bəs sənin qohumun Telman da “moşennikdir”?
E.A: Telman mənim qohumum deyil. Zahid Dünyamalıyevin adamıdır, onun tapşırığı ilə mənim üstümə gəlib.
A.K: Sən get Telmandan yapış.
Vilayət Eyvazov məndən fil sümüyündən olan stol-stulu tələb edirdi
Haşiyə: Elşad Abdullayevin sözlərinə görə, Telman Muradov özünü ona DIN-in Ictimai Təhlükəsizlik Idarəsinin əməkdaşı kimi təqdim edib. Bildirib ki, o, DIN-in Ictimai Təhlükəsizlik Idarəsinin polkovnikidir, rəisləri isə Ramiz Mehdiyevin oğlu Teymur Mehdiyevdir. Telman Muradov Mahiri geri qaytrmaq üçün Elşad Abdullayevdən 1 milyon dollar istəyib, zəmanət kimi sabiq rektora fil sümüyündən klassik üslubda hazırlanmış bahalı stol və 4 ədəd stul verib. Elşad Abdullayev Telman Muradova “avans” kimi 10 min dollar verib. Şərt kəsib ki, əgər Mahiri təhvil versə, tələb etdiyi məbləği tam alacaq. Telman Muradov verdiyi sözü yerinə yetirə bilməyib və Elşad Abdullayevdən verdiyi stol-stulu tələb edib. Sabiq rektor bu barədə deyib: “Bu bahalı stol-stulu Mütəşəkkil Cinayətkarlığa Qarşı Mübarizə Idarəsinin rəisi Vilayət Eyvazov də məndən tələb etdi. Hətta fil sümyündən hazırlanmış bahalı stol-stul söhbəti prezidentin əmisi Aqil Əliyevə də çatdı. O, fil sümyündən hazırlanmış stol-stulu özü üçün istədi. Mən də həmin stol-stulu Aqil Əliyevə verdim. Mütəşəkkil Cinayətkarlığa Qarşı Mübarizə Idarəsinin məndən Telmanın fil sümyündən hazırlanmış stol-stulunu tələb etdikdə, mən qurumun müstəntiqi Yaşar Haqverdiyevə yazılı olaraq ifadə verdim ki, axtardığınız stol-stulu təhvil vermişəm prezidentin əmisi akademik Aqil Əliyevə. Bu barədə Vilayət Eyvazova da telefonla məlumat verdik. Telman Muradov Azərbaycanda adam oğurluğu ilə məşğul olan mütəşəkkil cinayətkar təşkilatın olduqca önəmli fiqurlarından olduğu üçün söz yayılmasın deyə onu gizlin olaraq həbsdə saxlayırlar. Bu barədə biz dəfələrlə müraciət etsək də, bizə məlumat verən olmadı. Telman Muradov haqqında bir çox video faktlar var, yaxın günlərdə yayacağıq”.
Aqil Əliyev Mahirin işini Ramil Usubova xahiş etmişdi
E.A: Mən Mahiri geri almaq üçün pulu sənə və Zahidə vermişəm, Telmana yox. Zahid general adamdır, 17 aydır pulu alıb işi görə bilmir, onda ya adamı qaytarsın, ya da pulu. Mahirin ya dirisini, yaxud da ölüsünü versin, gedib qayda-qanunla yasını verək, mürəkkəb dünyadır elə bilərik Qarabağda şəhid olanlardan biridir. Mən Mahirə görə pulu sizə vermişəm, Telmana yox.
A.K: Mənə verdiyin pula başımla cavabdehəm, nə vaxt desən qaytararam, amma bir az vaxt lazımdır.
E.A: Daxili Işlər naziri Ramil Usubov mənə dedi ki, Zahid Dünymalıyevə etibar et. Mən də Ramil Usubova prezidentin əmisi Aqil Əliyevə görə etibar etmişdim. Aqil Əliyev Mahirin işini Ramil Usubova xahiş etmişdi.
A.K: Sənin pulun məndədir.
E.A: Mahirin geri qaytarılması üçün mən pulu Zahid Dünyamalıyevə vermişəm, generallığına salmasın, qardaşımı qaytarsın.
A.K: Sabah mən Zahid ilə bir yerdə olacağam, ondan sonra səndən alınan pulları geri qaytaracağam. Sən mənim arxamca danışma.
E.A: Qayda-qanun var, adamın pulunu almısan oğurlanmış adamı qaytarmalısan.
Zahid Dünyamalıyevlə hər şeyi konkret danışacağam
A.K: Burada söhbət başqa şeydən gedir, Zahid Dünyamalıyev Mahiri azad edə bilmir.
E.A: Zahid Dünyamalıyev Mahiri geri qaytara bilmirsə nə üçün məndən 17 aydır pulu almısınız? Hazırda Zahid Dünyamalıyev məndən qaçır, məni qəbul etməkdən imtina etdi. Mən də onun icazəsi olmadan Zahid Dünyamalıyevin DIN-in 6-cı mərtəbəsində ki iş otağına girdim, özü də məətəl qaldı ki, necə oldu ki, onun qəbuluna icazəsiz girdim. Zahid Dünyamalıyevin qarşısında konkret söhbət qoydum, ya Mahiri qaytar, yaxud da aldığın pulu!
A.K: Mahiri Zahid Dünyamalıyev qaytara bilmir, sabah onunla konkret danışacam. Desə ki, qaytara bilmir məndəki pulu qaytaracağam, heç kim heç kimin pulunu yeyə bilməz, məndəkinə başımla cavabdehəm, mənə vaxt ver.
E.A: Əgər Mahiri qaytara bilmirsinizsə pulu nə ücün almısınız? 17 aydır pulu almısınız gündə mənə qarşı bir hoqqa yaradırsınız, Zahid Dünyamalıyev general adamdır, heç olmasa generallığından utansın. Gündə üstümə bir “moşennik” göndərir. Telman, Əli Zəngilanski, Nüşabə, Seva, Sənan, Şaqo (Şahin Cəlilabadlı), Səftər, Kəkilli (Qarbaçov), Rasim, Mətanət. Telmana bir qapaz vuran kimi hər şeyi etiraf etdi, dedi ki, məni Zahid Dünyamalıyev göndərib.
A.K: Sabah gedib Zahid Dünyamalıyevlə hər şeyi konkret danışacağam, sonra da pulunu qaytaracağam.
Mahirə görə pulunuzu almısınız, indi də deyirsiniz evini ver, universitetini ver
E.A: Siz məni nə hesab edirsiniz? Erməni ilə dil tapmaq olar, sizinlə dil tapmaq olmur. Mahirə görə pulunuzu almısınız, indi də deyirsiniz evini ver, Azərbaycan Beynəlxalq Universitetini ver, bu gün deyir 5 milyon avro gətir. Məni Zahid Dünyamalıyev yox, Ramil Usubov aldadıb. Prezidentin əmisi akademik Aqil Əliyev 3 dəfə Ramil Usubova zəng etdi ki, Mahirin işi həll olunsun, mənə söz verdi. Zahidə də Ramil Usubov xahiş etmişdi, Arzu Kazımov, sənə də Zahid Dünyamalıyevə görə etibar etmişəm, yoxsa heç bir vaxt mən siz kimi adamlara etibar etmərəm, bunları biz ağsaqqal hesab edirdik. Bunlar necə adamlardır, bir-birilərinə “atırlar”! Görmürsən Hacı Məmmədov nə qədər adama “atıb”?!.
A.K: Elşad müəllim, mən sənin tərəfindəyəm, sabah Zahid Dünyamalıyevlə danışacağam. Sənin pulun məndədir, Zahidlə danışdıqdan sonra həll edəcəm. Orda-burda mənim arxamca danışma.
E.A: Arzu, mən bu işdə zərəçəkmiş adamam, mənim qardaşımı oğurlayıblar, pulunu da almısınız. Onu bil ki, oğurluqla pozğunluq 40 gün çəkir, 40 gündən sonra hamısı açılır, onsuz da bu cinayət gec-tez açılacaq.
A.K: Heç kim sizin pulunuzu yeyə bilməz, məndə olana başımla cavabdehəm, mənə vaxt ver.
E.A: Sənə də vermişəm, Zahid Dünyamalıyevə də, hələ də adamı qaytarmamasınız.
A.K: Sabah birdən Zahid Dünyamalıyev desə ki, bacarmıram, məndəkini qaytaracağam.
E.A: Onda Zahid Dünyamalıyevə denən ondakı olan pulu da qaytarsın.(azadlıq)
