Demokratik Qüvvələrin Milli Şurası Aparatının rəhbəri Eldar Namazov iyunun 20-də “Media forum” saytının suallarını cavablandırıb.
– Milli Şuranın sabah keçiriləcək birinci sessiyasında nələr müzakirə ediləcək?
– Gündəlikdə bir neçə məsələ var. Birincisi, Milli Şuranın əsasnaməsinə uyğun olaraq komissiyalar, işçi qrupları yaradılmalıdır. Bununla bağlı icra aparatı siyasi partiyalarla, vətəndaş cəmiyyətinin nümayəndələri ilə məsləhətləşmələr aparıb, müəyyən təkliflər hazırlayıb. Bütün mühüm sahələr üzrə komissiya yaradılması nəzərdə tutulub.
Təbii ki, həm mətbuatda, həm də ictimai rəydə qarşıdan gələn prezident seçkisi prioritet mövzu sayılır. Milli Şuranın da əsas məqsədi seçkidə vahid komanda ilə, vahid namizədlə iştirak etməkdir. Bu mövzular ətrafında da fikir mübadiləsi aparılacaq.
Seçkidən sonrakı keçid dövrünün konsepsiyası, Milli Şuranın vahid namizədi seçkidə uğur qazanacağı təqdirdə keçid dövründə atılacaq addımlar haqqında aydın təsəvvür olmalıdır, vahid mövqe olmalıdır.
Milli Şuranın birinci sessiyası, əminəm ki, çox maraqlı keçəcək və mühüm qərarlar qəbul ediləcək.
– Milli Şuranın komissiyaları hansı sahələri əhatə edəcək?
– Milli Şurada birləşmiş qüvvələr Azərbaycanın gələcəyi ilə bağlı məsuliyyəti öz üzərinə götürə biləcək qüvvələrdir. Bu, istənilən dövlət quruculuğu, islahat proqramını həyata keçirməyə gücü yetəcək bir komandadır. Bunun üçün bizim siyasi təcrübəmiz, iradəmiz və geniş kadr potensialımız var.
Milli Şuranın məqsəd və məramlarına uyğun olaraq yaradılacaq komissiyalar həyatın bütün sahələrini əhatə etməlidir – dövlət idarəçiliyi sistemindən ekologiya sahəsinə qədər. Keçid dövrü üçün şuranın bütün sahələr üzrə iş planını hazırlamalıyıq. Bütün vacib sahələr üzrə mütəxəssislərimiz var. Onların təcrübəsindən, savadından səmərəli istifadə etməliyik. Milli Şuranın Azərbaycanın gələcəyi ilə bağlı çox ciddi və hərtərəfli konsepsiyaları, proqramları olmalıdır. Buna uyğun olaraq da komissiyalar formalaşdırılacaq.
– İcra aparatının formalaşdırılması prosesi haqda nə deyə bilərsiz?
– Milli Şuranın əsasnaməsinə görə, icra aparatını sədr, komissiyaları isə sessiya formalaşdırır. Ona görə də icra aparatının işi ilə bağlı mütəmadi olaraq Milli Şuranın sədri Rüstəm İbrahimbəyovla əlaqə saxlayırıq. Aparatın formalaşdırılması prosesi davam edir. Yaxın zamanlarda Milli Şuranın sədri aparatın əsasnaməsini və strukturunu təsdiqləyəcək. Son qərarlar qəbul olunandan sonra cəmiyyətə daha geniş açıqlama verəcəyik. Hazırda isə icra aparatına daxil olan şəxslər öz funksiyalarını yerinə yetirirlər. Əsas odur ki, iş gedir.
– Milli Şurada vahid namizədlə bağlı danışıqlar hansı mərhələdədir? Mətbuat vahid namizədlə bağlı bəzi fikir ayrılıqlarının olduğunu yazır…
– Açığı, bəzən mətbuatda dəqiq olmayan məlumatlar yayılır. Bu, bir sindromdur. Müxalifət son 20 ildə seçkilərə vahid namizədlə getməyib. Yəqin bu məsələ ilə bağlı cəmiyyətdə bir inamsızlıq yaranıb. Müxalifətin indi də bir araya gələcəyinə, böyük bir koalisiyada birləşib, prezident seçkisində vahid qüvvə kimi iştirak edəcəyinə çoxları inanmırdı. Milli Şuranın yaranması bu stereotipi darmadağın etdi.
Mən sizi əmin edirəm ki, vahid namizəd məsələsində heç bir problem olmayacaq. Bu məsələ ilə bağlı artıq konsensus var, seçkiyə vahid namizədlə gedəcəyik. Əminəm ki, bu il keçiriləcək prezident seçkisində biz Azərbaycanda avtoritarizmdən demokratiyaya keçidin başlanmasını təmin edəcəyik. Məndə buna zərrə qədər şübhə yoxdur
