Erməni hərbi əsirlərin geri qayıtması təmin edilməlidir
Avropa Parlamenti erməni hərbi əsirlərin geri qayıtmasının təmin edilməsinə önəm verir və bu istiqamətdə səylərini davam etdirəcək.
Avropa Parlamentinin Xarici Əlaqələr Komitəsinin sədri Deyvid Makallister Ermənistanın baş naziri Nikol Paşinyanla görüşdə belə deyib.
İrəvanda keçirilən həmin görüşdə Cənubi Qafqaz regionunda baş verən proseslərə, Qarabağ ətrafındakı vəziyyətə, regional infrastrukturların blokadadan çıxarılması imkanlarına, Ermənistanla Azərbaycan arasında sərhədin müəyyənləşdirilməsinə toxunan avroplalı rəsmi qeyd edib ki, Avropa Parlamenti erməni hərbi əsirlərin geri qayıtmasının təmin edilməsinə önəm verir və bu istiqamətdə səylərini davam etdirəcəkdir.
Azərbaycanın nəzarətinə keçən ərazilərdə erməni mədəni irsinin qorunması ilə bağlı məsələlər də müzakirə olunub. Və Deyvid Makallister UNESCO missiyasının Qarabağda münaqişə zonasına çıxışının təmin edilməsinin və bu məqsədlə ardıcıl işlərin həyata keçirilməsinin vacibliyini vurğulayıb.
