Bu gün Bakı Apellyasiya Məhkəməsində narkotik vasitələrin qanunsuz dövriyyəsində ittiham olunan bloger Rəşad Ramazanovun şikayətinə baxılıb.
Qafqaz.ir-nin məlumatına əsasən, prosesdə Ramazanov ona qarşı irəli sürülmüş ittihamı rədd edib, sosial şəbəkələrdə tənqidi nəşrlərinə görə təqibə məruz qaldığını bildirib, bu barədə Turan-a onun vəkili Elçin Sadıqov bildirib.
Bloger həmçinin saxlanıldıqdan sonra 14-cü polis bölməsində etirafedici ifadə verməsi üçün işgəncəyə məruz qaldığını bildirib. Onun cibinə narkotiki məhz bu idarədə qoyublar.
“Rəşadın hər iki ayağında, başında ağır işgəncə izləri var. Ayaqlarındakı yaralar açıq izləridir”, deyə vəkil bildirib.
Amma məhkəmə həbsdən verilən şikayəti təmin etməyib. Müdafiə tərəfi qətimkan tədbirinin dəyişdirilməsi üçün hüquqi vasitələrdən istifadə etməyə davam edəcək. Bundan başqa, işgəncələrlə bağlı şikayət veriləcək.
Daxili İşlər Nazirliyinin Mətbuat xidməti isə məhkəmə prosesi zamanı Rəşad Ramazanov tərəfindən səsləndirilən iddiaları əsassız adlandırıb.
Rəşad Ramazanov mayın 20-də həbs olunub. Sabunçu Rayon Məhkəməsi tərəfindən Ramazanov barəsində 4 aylıq həbs qətimkan tədbiri seçilib.
Rəşad Ramazanov birinci dəfə 2013-cü ilin mayında həbs olunub və daha sonra külli miqdarda narkotik vasitələrin qanunsuz dövriyyəsi ittihamı ilə 9 il müddətinə azadlıqdan məhrum edilib. Yerli hüquq müdafiə təşkilatları onun həbsinin əsl səbəbini sosial şəbəkələrdə hakimiyyəti tənqid etməsilə əlaqələndiriblər və onu siyasi məhbus kimi tanıyıblar.
2019-cu ilin martında Rəşad Ramazanov əfv fərmanı ilə vaxtından əvvəl azad edilib.
