Pentaqon İŞİD lideri Əbu Bəkr əl-Bağdadinin məhv edilməsinin görüntülərini yaydı – VİDEO

ABŞ Müdafiə Nazirliyi İŞİD lideri Əbu Bəkr əl-Bağdadinin məhv edilməsi əməliyyatının görüntülərini və əməliyyatın təfərrüatlarını açıqlayıb.

Virtualaz.org xəbər verir ki, ABŞ Mərkəz komandanlığının rəhbəri, general Kennet Makkenzi keçirdiyi brifinqdə bildirib ki, hücum vertolyotların köməyi ilə həyata keçirilib. Hücumdan əvvəl xüsusi təyinatlıları Suriya ərazisində qruplar halında cəmləşdiriblər. Terrorçunun məhv edilməsi əməliyyatı elə planlaşdırılmışdı ki, İŞİD üzvləri onun üstünü aça bilməsinlər və yerli sakinlərdən heç kim zərər çəkməsin.

General Makkenzi Bağdadinin olduğu evin video və fotolarını da təqdim edib. O, xatırladıb ki, iqamətgah İdlib əyalətində, Suriyanın şimal şərqində və Türkiyə sərhədindən cəmi 6.4 kilometr məsafədə idi. “Bu elə zonadır ki, biz adətən orada əməliyyatlar keçirmirdik. Ora çatmaq üçün Suriyadakı bazamızdan vertolyotlarla təxminən bir saat uçmaq lazım gəldi”,-Makkenzi bildirib.

Videonu şərh edən general qeyd edib ki, İŞİD yaraqlıları Amerika vertolyotlarını iki nöqtədən atəşə tutublar, lakin atəş nöqtləri susdurulub. Binaya hücumdan əvvəl xüsusi təyinatlılar içəridəkilərə təslim olmağı təklif ediblər. Növbəti videoda isə xüsusi təyinatlıların iki qrupu binaya yaxınlaşır. İçəridən çıxanlar yoxlanılır, sonra kənara çəkilir və hücum başlayır. Generalın sözlərinə görə, binada 11 uşaq olub.

Makkenzi qeyd edib ki, İŞİD yaraqlılarından beşi hərbçilərə təhlükə yaradıb və ərəb dilində təslim olmaq komandası verilsə də təslim olmayıblar. Söhbət dörd qadın və bir kişidən gedir, xüsusi təyinatlılar onları məhv ediblər. “Amerika döyüşçüləri tərəfindən sağ ələ keçiriləcəyinin qaçılmaz olduğunu görərək əl-Bağdadi üzərindəki bombanı partladıb, bu zaman onun yanında iki azyaşlı uşağı da var idi. Uşaqların yaşı 12-dən aşağı olub”,-komandan deyib.

Kennet Makkenzi bildirib ki, iki mərhələdə Bağadinin qalıqlarının DNK ekspertizası aparılıb və qalıqların İŞİD liderinə aid olduğu tamamilə təsdiqlənib. Terrorçunun cəsədinin qalıqları dənizə atılıb.