Yenə məscid sökülür
Lerik rayonunun Peştətük kənd sakinlərinin öz şəxsi hesablarına tikdikləri məscidi, Lerik rayon icra başçısı Rövşən Bağırov verdiyi sərəncamla sökdürür.
Məhərrəmlik və Ramazan aylarında Azərbaycanda fitnənin tüğyan etdiyini görməsəniz, bilin ki, çərxi fələk tərsinə dövran edir. Bəli, siz yanılmadınız, səhv oxumadınız, vəziyyət məhz belədir, çünki, əliyev rejiminin uzun illədir apardığı siyasət nəticəsində ortalığa başqa məntiq qoymaq mümkün deyil, ayrı cür olarsa cəmiyyətin təsəvvürləri yeniləşə bilər, insanlar gördüklərini anlaya bilməz.
Cəmiyyət xüsusilə müqəddəs aylarda İslama və müsəlmanlara qarşı o qədər həqarət, təhqir, alçaldıcı hərəkətlər, təzyiq görüb ki, buna vərdiş edib, bunu təbii sayır, buna etiraz etməyi ağlından belə keçirmir.
Cəmiyyət deyəndə beş on nəfər fəalı nəzərdə tutmuruq, kütləni nəzərdə tuturuq. Məhərrəmlik ayı başlayandan Bakının bahalı otellərində cürəbəcürə əyləncəli şoular, avropanın seks simvolarının şou proqramları, geylərin əyləncəi gecələri və bunları işıqlandıran yerli mətbuat cəmiyyəti zəhərləməkdə davam edir. Bundan başqa Bakıda və rayonlarda məscidlərə əzadarlığa gedən cavan dindarları min bir bəhanə ilə polis saxlayır, bir neçə saat bölmədə saxlayıb incidir, buraxdığından pul alır buraxır, buraxmadığını da şərləyərək məhkəməyə göndərib həbsə atdırır. Məsələn, noyabrın 29-da Saatlı rayon sakinləri Qurbanov Pərviz və Ağakişiyev Hüseyn adlı iki gənc axşam məsciddən evə gələrkən polis onları saxlayaraq bildirib ki, barələrində şikayət var, guya bu gənclər dünyəvi dövlətə qarşı çağrışlar edib hər ikisi haqqında məhkəmə 2 aylıq həbsqətimkan tədbiri seçib. Hansı
” Məhərrəmlik ayı başlayandan Bakının bahalı otellərində cürəbəcürə əyləncəli şoular, avropanın seks simvolarının şou proqramları, geylərin əyləncəi gecələri və bunları işıqlandıran yerli mətbuat cəmiyyəti zəhərləməkdə davam edir. “
ki, bu gənclər uzun müddətdir Rusiyanın Krasnoyars şəhərində yaşayır, axırıncı dəfə 2007-ci ildə vətəndə olublar, bu dəfə isə Azərbaycana noyabrın 27-də gəliblər, qohum olan Pərviz və Hüseyn yaxınlarının hüzür mərasimində iştirak üçün həm də ailələrinə baş çəkmək üçün Saatlıya gəliblər.
Sonradan bəlli olur ki, bu gənclər şiə dindarları olduğu üçün rayon icra başçısı onları həbsə atdırmaq qərarına gəlib. Azərbaycanın rayonlarında bütün sahələrdə olduğu kimi din sahəsində də icra başçıları xalqa zülm verməkdə bir biri ilə bəhsə girdiyi açıq bir faktdır.
Bu gün isə xəbər gəlir ki, Lerik rayonunun Peştətük kənd sakinlərinin öz şəxsi hesablarına tikdikləri məscidi, Lerik rayon icra başçısı Rövşən Bağırov verdiyi sərəncamla sökdürür.
Burda bir maraqlı məqam da budur ki, həmin məcsid üçün torpaq sahəsi qanuni yolla bələdiyyədən alınıb, Dini qurumlarla iş üzrə dövlət komitəsinə müvafiq qaydada məscidin qeydiyyatı üçün müraciət olunub, rayon icra hakimiyyətinə müraciət olunub və Allahn evi tikilib. Yəni qanun pozuntusu olmayıb. Ancaq RİH-nin başçısı Rövşən Bağırov səbəbini açıqlamadan sərəncam verib ki, xalqın öz şəxsi pul vəsaiti və zəhməti hesabına ərsəyə gətirdiyi məscid sökülsün.
Rövşən Bağırovun bu hərəkətinin adını nə istəsəniz qoya bilərsiniz, Şeytana aldanıb, Şeytan yolundadır, bir sözlə, fantaziyanız nəyə imkan verirsə o adı da qoyun, ancaq bütün bunların heç birisi məscidin sökülməməsini təmin etmir, məscid sökülür.
Kənd sakinləri dəstək almaq üçün qərara gəliblər ki, QMİ sədri Allahşükür Paşazadəyə və prezident İlham Əliyevə müraciət etsinlər, bu müraciətin nəticəsinin olacağını indidən demək çətindir, çünki Rövşən Bağırov icra hakimiyyətinin başçısı vəzifəsinə də göydən düşməyib. Yəni Azərbaycanda çərxi fələk düz dövran edir.
