“Hökumətin içində prezidentin ayağının altını qazan qüvvələr var”
Abgül Süleymanov:”Azərbaycanda hökumət əleyhinə başqa qüvvə qaldıra bilmədiklərindən, islamçıları sıxışdırmaqla öz məqsədlərinə çatmağa çalışırlar”
Xəbər verdiyimiz kimi dünən axşam saatlarında “Müsəlman Birliyi Hərəkatı”nın sədri hacı Tale Bağırzadə polis bölməsinə çağırılıb. Polis bölməsində baş verənlər barədə ilahiyyatçı öz “facebook” səhifəsində məlumat yaymışdı.
Baş vermiş məsələ ilə əlaqədar 11 il həbsə məhkum edilmiş ilahiyyatçı hacı Abgül Süleymanov İslamazeri.az-a münasibət bildirib. Hacı Abgül Süleymanov ilahiyyatçıya qarşı olan zorakılıqdan çox narahat olduğunu dilə gətirib: “Bir müsəlmanın namazına imkan verməmək, hüquqlarını pozmaq, haqqını tapdalamaq nə deməkdir axı?! Ölkədə özbaşınalıq baş alıb gedir! Bütün bunlara etirazlar olmalıdır. Bu hadisə bizi çox narahat etdi. Ümumiyyətlə Hacı Tale ilə bağlı baş verən hadisələrə nəzər saldıqda, istər Gəncə, Yevlax, Şəmkir hadisələri, istərsə də həbsdən çıxdıqdan sonra ona qarşı olan bütün təzyiqlər və sonuncu bu hadisə ki, hacı Taleyin polis bölməsinə aparılması zamanı onu namaz qılmağa qoymayıb, əl-qol atıblar. Bu məmur özbaşınalığına son qoyulsun! Azərbaycanda ümumiyyətlə gedişat onu göstərir ki, ölkədə məmur özbaşınalığı hökm sürür. Hökumətin içində ABŞ, Qərbə bağlı gizli qüvvələr var. Onlar bu işləri ilə əslində prezidentin ayağının altını qazmaqla Heydər Əliyev hökumətini dağıtmaq istəyirlər. Onlar Azərbaycanda hökumət əleyhinə başqa qüvvə qaldıra bilmədiklərindən və islamçıları sıxışdırmaqla öz məqsədlərinə çatmağa çalışırlar. Çalışırlar ki, islamçıları yormaqla, bezdirməklə, narazı kütlənin sayını artırsınlar və hökumətin əleyhinə qaldırsınlar. Son olaraq MTN-dəki həbslər və onların millətə, dövlətə etdikləri xəyanətlər bunun açıq göstəricisidir. Mən bütün islamçı müsəlmanların hamısını tədbirli, təmkinli şəkildə məmurlara, rəsmi dairələrə müraciətlə, dinc aksiyalarla, konfranslarla və bütün ölkə müsəlmanlarını bilgiləndirməklə etiraz etməyə çağırıram. Birinci və axırıncı dəfə olsun mənim doğmam, qardaşım Hacı Taleyə qarşı belə hörmətsizlik edilir. Bu yaxşı nəticə verməyəcək. Bu hökumətlə islamçıları üzbəüz qoymaqdır. Xalqla hökumət arasında narazılıq yaratmağın sonu heç vaxt yaxşı bitməyib. Mən yuxarı dairələrə üzümü tutub deyirəm ki, bu məsələlərin qarşısını alsınlar. Və son olaraq bildirirəm ki, hacı Taleyə qarşı olunan hörmətsizlik mənə, bütün Azərbaycan ruhanilərinə, ümumən İslama qarşı hörmətsizlikdir. Elə bu səbəbdən də bütün mənim xətrimi istəyənləri, sözümə hörmət edənləri, məni öz qardaşları bilən müqavimətçiləri hacı Taleyin ətrafında cəm olmağa çağırıram. Bu sözümü müzakirə obyektinə çevirənlərlə heç bir mənəvi əlaqəm yoxdur”.
