Avropa İttifaqı (Aİ) Aralıq dənizinin şərq hissəsindəki fəaliyyətinə görə Türkiyəyə qarşı sanksiyaları daha 1 il müddətinə uzadıb.
Bu barədə Aİ-nin xarici siyasət xidmətindən məlumat verilib.
“Türkiyənin Şərqi Aralıq dənizindəki icazəsiz qazıntı işlərinə cavab olaraq qəbul edilmiş məhdudlaşdırıcı tədbirlərin çərçivələrinin qiymətləndirilməsindən sonra Şura bu gün (həmin) rejimin 1 il (müddətinə) – 2022-ci 12 noyabradək uzadılmasına dair qərar qəbul edib”, – deyə bəyanatda qeyd edilib.
Xatırladaq ki, Aİ 2020-ci ilin avqust ayında bildirmişdi ki, Aralıq Dənizindəki qazıntı fəaliyyətinə görə Türkiyəyə sanksiya tətbiq edəcək.
Türkiyə XİN buna cavab olaraq bəyan edib ki, Aİ-nin Türkiyəni öz kontinental şelfindəki geoloji-kəşfiyyat fəaliyyətinə görə tənqid etmək haqqı yoxdur.