İran-Azərbaycan arasında qarşılıqlı əməkdaşlığa dair Anlaşma Memorandumu imzalanıb
Azərbaycanda iqtisadiyyatın müxtəlif sahələrində 400-dən çox İran investisiyalı şirkət fəaliyyət göstərir və onlar tərəfindən Azərbaycan iqtisadiyyatına 2,5 milyard ABŞ dollarından artıq investisiya yatırılıb. İran Azərbaycanın ticarət tərəfdaşlarındandır və 2016-cı ilin yanvar-noyabr aylarında ölkələrimiz arasında ticarət dövriyyəsi 60 faizə yaxın artıb.
AZƏRTAC xəbər verir ki, bu barədə iqtisadiyyat naziri Şahin Mustafayev dekabrın 27-də Bakıda keçirilən Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 11-ci iclasında deyib.
Tədbir İran İslam Respublikasının rabitə və informasiya texnologiyaları naziri Mahmud Vaezinin rəhbərlik etdiyi nümayəndə heyətinin ölkəmizə səfəri çərçivəsində baş tutub.
İqtisadiyyat naziri, komissiyanın həmsədri Şahin Mustafayev qeyd edib ki, Azərbaycan-İran əlaqələri ortaq dinə, tarixə və adət-ənənələrə əsaslanır və xalqlarımızı sıx əlaqələr birləşdirir. Dövlət başçılarının siyasi iradəsi nəticəsində son 3 ildə Azərbaycan-İran əlaqələri xüsusilə inkişaf edib və yeni mərhələyə qədəm qoyub. Bu gün ölkələrimiz arasındakı əlaqələr yüksək səviyyədədir. Bildirilib ki, ötən 3 ildə Azərbaycan və İran prezidentləri 7 dəfə görüşüb, Azərbaycan və İran nümayəndə heyətlərinin 100-ə yaxın qarşılıqlı səfəri həyata keçirilib, 40-a yaxın sənəd imzalanıb, Dövlət Komissiyasının 3 iclası təşkil olunub.
Azərbaycan-İran arasında iqtisadi əlaqələrin inkişafında Dövlət Komissiyasının rolunu qeyd edən Şahin Mustafayev Komissiyanın 10-cu iclasından keçən dövrdə görülmüş işlər barədə məlumat verib. Qeyd olunub ki, “Xudafərin” və “Qız Qalası” Sazişi imzalanıb və bu yaxınlarda İran tərəfi həmin sənədi ratifikasiya edib. Azərbaycan və İran arasında imzalanmış “Ordubad” və “Marazad” su elektrik stansiyalarının tikintisi və istismarı haqqında” Saziş də artıq ratifikasiya edilib. Bu sazişlərin siyasi və iqtisadi əhəmiyyəti yüksəkdir.
“Şimal-Cənub” beynəlxalq nəqliyyat dəhlizinin birinci mərhələsi yekunlaşır. Artıq nəqliyyat dəhlizinin önəmli halqalarından olan Astara çayı üzərində dəmir yolu körpüsü və Astara stansiyasından (Azərbaycan) İran sərhədinədək olan 8,3 kilometrlik dəmir yolu xətti hazırdır. İran tərəfi öz ərazisində işləri qısa müddətdə yekunlaşdıracaq. Bu il 330 kV Muğan (İmişli-Parsabad) elektrik xətti istismara verilib, elektrik satışı üzrə Çərçivə Sazişi imzalanıb.
2016-cı ilin avqust ayında təməli qoyulmuş Neftçala Sənaye Zonasında birgə avtomobil istehsalı zavodunun tikintisi davam edir. İranın traktor və avtobus istehsalı zavodlarının da Neftçala Sənaye Zonasında fəaliyyətinin təşkili istiqamətində müzakirələr aparılır. 2017-ci ilin yanvarında isə Pirallahı Sənaye Parkında İranla birgə əczaçılıq zavodunun təməli qoyulacaq.
Bildirilib ki, Azərbaycanda iqtisadiyyatın müxtəlif sahələrində 400-dən çox İran investisiyalı şirkət fəaliyyət göstərir və onlar tərəfindən Azərbaycan iqtisadiyyatına 2,5 milyard ABŞ dollarından artıq investisiya yatırılıb. İran Azərbaycanın ticarət tərəfdaşlarındandır və 2016-cı ilin yanvar-noyabr aylarında ölkələrimiz arasında ticarət dövriyyəsi 60 faizə yaxın artıb. Şahin Mustafayev diqqətə çatdırıb ki, təkcə 2016-cı ildə iş adamlarının iştirakı ilə 12 biznes forum, işgüzar görüş və sərgilər keçirilib. Naxçıvan-Culfa-Təbriz-Tehran-Məşhəd dəmir yolu əlaqələrin daha da genişləndirilməsinə imkan verəcək. Bu yolla il ərzində 12 min sərnişin daşınacaq. Rəsmi şəxslərdən və iş adamlarından ibarət Azərbaycan nümayəndə heyəti 2017-ci ilin əvvəlində Təbriz və Ərdəbilə səfər edəcək. Ölkələrimiz arasında viza rejiminin sadələşdirilməsi nəticəsində gələn il yanvarın 10-dan başlayaraq İran vətəndaşları 3 gün ərzində elektron vizalar ala biləcəklər.
Əməkdaşlığın genişləndirilməsi perspektivlərindən danışan nazir Şahin Mustafayev qeyd edib ki, kənd təsərrüfatı, sənaye, ticarət, nəqliyyat, turizm, səhiyyə, bankçılıq və s. sahələrdə əməkdaşlıq üçün böyük imkanlar var.
İran İslam Respublikasının rabitə və informasiya texnologiyaları naziri, Dövlət Komissiyasının həmsədri Mahmud Vaezi ölkəsinin Azərbaycanla əlaqələrin genişlənməsinə xüsusi önəm verdiyini, son 25 ildə Azərbaycan-İran əlaqələrinin ən yüksək səviyyəyə çatdığını qeyd edib. M.Vaezi ölkələrimiz arasında əlaqələrin inkişafına və Dövlət Komissiyasının işinə göstərdikləri dəstəyə görə hər iki dövlətin başçılarına təşəkkür edib.
Bildirilib ki, Azərbaycan-İran Dövlət Komissiyasının fəaliyyəti digər ölkələrlə olan komissiyalarla müqayisədə bütün sahələri əhatə edir. Azərbaycana səfər çərçivəsində Azərbaycan nümayəndə heyətində 130-dan çox iş adamının təmsil olunması əlaqələrin genişləndirilməsinə olan maraqdan xəbər verir. İranlı nazir qeyd edib ki, ölkələrimiz arasında ticarət dövriyyəsinin artması müsbət haldır və banklararası əlaqələrin genişləndirilməsi ticarət dövriyyəsini daha da artıra bilər. Bundan başqa, ölkələrimiz arasında kənd təsərrüfatı məhsullarının birgə ixracı və aqrar sahədə avadanlıqların istehsalı üçün potensial genişdir. Turizm, tranzit və yükdaşımalar sahələrində də əlaqələr uğurla davam edir.
Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 11-ci iclası çərçivəsində iqtisadiyyatın müxtəlif sahələrində Azərbaycan-İran iqtisadi əməkdaşlığına, o cümlədən “Şimal-Cənub” beynəlxalq nəqliyyat dəhlizinin II mərhələsi üzrə görüləcək işlərə, ölkələrimiz arasında birgə həyata keçirilən layihələrə, ticarət əlaqələrinin genişləndirilməsinə dair müzakirələr aparılıb.
Sonra İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı, eləcə də sənaye, kənd təsərrüfatı, tikinti, qida sənayesi, əczaçılıq, avtomobil istehsalı, turizm, idxal-ixrac, sığorta və s. sahələrdə fəaliyyət göstərən 200-dən çox iş adamının iştirakı ilə Azərbaycan-İran biznes-forumu keçirilib.
Biznes-forumda çıxış edən iqtisadiyyat naziri Şahin Mustafayev qeyd edib ki, Azərbaycan və İran arasında siyasi əlaqələr yüksək səviyyədədir və əməkdaşlığımız iqtisadiyyatın müxtəlif sahələrində uğurla davam edir. Azərbaycan-İran iqtisadi əlaqələrinin genişlənməsi baxımından işgüzar dairələr arasında əməkdaşlığın vacibliyini vurğulayan Şahin Mustafayev 2016-cı ilin 11 ayında ölkələrimiz arasında ticarət dövriyyəsinin 60 faizə yaxın artdığını, viza rejiminin sadələşdirilməsi istiqamətində işlərin görüldüyünü, bu ilin 11 ayında iş adamlarının iştirakı ilə 12 tədbirin keçirildiyini qeyd edib. Bildirilib ki, iş adamları arasında əlaqələrin genişləndirilməsi və yeni əməkdaşlığın qurulması baxımdan biznes-forum, işgüzar görüş və sərgilərin keçirilməsi önəmlidir və bugünkü biznes-forum bu sahədə öz töhfəsini verəcək.
Qeyd olunub ki, ticarət əlaqələrinin inkişafı üçün yaradılmış birgə İşçi Qrupu faydalı mexanizmdir. Ticarət sahəsində əməkdaşlığın genişləndirilməsi üçün ixrac-idxal məhsulları qarşılıqlı əsasda müəyyənləşdirilə bilər. Toxumçuluq, tərəvəzçilik, çəltik və kənd təsərrüfatının müxtəlif istiqamətlərində əməkdaşlıq, Azərbaycanda yaradılan aqroparklarda kənd təsərrüfatı məhsullarının, eləcə də birgə avadanlıq istehsalı üçün geniş potensial mövcuddur. İran şirkətləri Azərbaycanın Aktaudakı logistika mərkəzinin xidmətlərindən istifadə edə, Gəmiqayırma Zavodunun və ölkəmizdəki sənaye parklarında yaradılmış əlverişli imkanlardan yararlana bilər.
İran İslam Respublikasının rabitə və informasiya texnologiyaları naziri, komissiyanın həmsədri Mahmud Vaezi ölkəsinin Azərbaycanla əlaqələrin inkişafında maraqlı olduğunu, ölkələrimiz arasında iqtisadi əməkdaşlığın genişləndirilməsi üçün böyük potensialı vurğulayıb, sənaye, kənd təsərrüfatı, ticarət, üçtərəfli formatda (Azərbaycan-İran-Türkiyə və Azərbaycan-İran-Rusiya) əməkdaşlığa dair fikirlərini bölüşüb.
Biznes-forum çərçivəsində Azərbaycan Respublikası Sahibkarlar (İşəgötürənlər) Təşkilatları Milli Konfederasiyası və İranın Ticarət, Sənaye, Mədən və Kənd Təsərrüfatı Palatası arasında Anlaşma Memorandumu imzalanıb.
Tədbir Azərbaycan və İran iş adamları arasında əməkdaşlıq imkanlarının müzakirə olunduğu ikitərəfli görüşlərlə davam edib.
