Azərbaycanda keçiriləcək prezident seçkilərinə 5 aydan bir qədər artıq vaxt qalıb. Amma istər iqtidar, istərsə də müxalifət partiyalarında seçki abu-havası ciddi şəkildə hiss olunmur. Zaman isə durmaq bilmir. Bəs görəsən vaxt iqtidarın, yoxsa müxalifətin xeyirinə işləyir?
“El” Hərəkatının Ali Məclisinin sədri Eldəniz Quliyev “Deyerler.org”a açıqlamasında deyib ki, vaxt haqqında fikir yürütmək düzgün deyil. “Məkan həmən məkandı. Amma vaxt ötür. Həmin məkanda iqtidar və müxalifət adlı iki cəbhə var ki, bunlar bu gün ziddiyətlə yaşayırlar. Amma bu gün üçüncü qüvvə özünü təzahür elətdirir ki, bu da xalqdır. Bu gün xalq öz taleyini özü müəyyənləşdirməyə qərarlıdır. Milli Şura ətrafında müzakirələr yekunlaşmaqdadır. Milli Şura ilə bağlı məsələ bir o qədər sadə olmadığı üçün, bu müzakirələrin dəqiq nə zaman bitəcəyini söyləmək çətindir. Amma bu ay bu müzakirələr bitəcək. Mən buna tam əminəm. Bu gün vaxt hər bir halda Azərbaycan iqtidarının xeyrinə işləmir. Amma o demək də deyil ki, vaxt müxalifətin xeyrinə işləyir” .
