Kim deyir, bu dünya yalan dünyadır?
Verdiyin kimdәnsә alan dünyadır,
Nuhdan, Süleymandan qalan dünyadır,
Verdiyin bir kәsdәn almayıb hәlә,
Dünya heç bir kәsә qalmayıb hәlә.
Verdiyi әmәldir dünyanın bizә,
Dәrindәn fikirlәş, diqqәt et sözә!
Әmәli aparrıq öz qәbrimizә,
Bir bax, min illәrdir dolmayıb hәlә,
Dünya heç bir kәsә qalmayıb hәlә.
Bir yanda yas yeri, bir yanda toydur,
Birinә kömәk et, birini doydur!
Nә birin talan et, nә birin söydür!
Zalımı cavabsız qoymayıb hәlә,
Dünya heç bir kәsә qalmayıb hәlә.
Mal-dövlәt toplayan olsun xәbәrdar,
Yatağın olacaq bir soyuq mәzar.
Dünyada qalacaq yığdığın nә var,
Özüylә aparan olmayıb hәlә,
Dünya heç bir kәsә qalmayıb hәlә.
Sәmәndәr, ölümdәn qaçan vardımı?
Tövbә et günahdan, mәgәr ardımı?
Әzrayıl izlәyir hәr bir addımı,
Sәni kәmәndinә salmayıb hәlә,
Dünya heç bir kәsә qalmayıb hәlә.
Səməndər Qarabağlı
