“Kərbəla hadisəsi bəşər tarixində nəhəng yer tutan vücudi hadisələrdəndir” – İçərişəhər “Cümə” məscidi dini icmasının məhərrəmin ilk ongünlüyü tədbirləri davam edir
İçərişəhər “Cümə” məscidinin dini icması məhərrəm ayının ilk ongünlüyü ilə bağlı geniş əzadarlıq mərasimlərini davam etdirir.
Mərasim əzadarlıq mərasimi ilə başladı. Əba Əbdillahın (ə) Kərbəlaya gəlişini təsvir edən, Məhərrəm-Səfər əyyamının başlamasını ehtiva edən mərsiyələr söyləndi.
Daha sonra İçərişəhər “Cümə” məscidinin imam-camaatı Hacı İlqar İbrahimoğlu xütbə söylədi. Hacı İlqar xütbənin əvvəlində Kərbəla məktəbinin digər qəhrəmanlıq məktəblərindən fərqinə toxunub: “Dünya tarixində çoxsaylı qəhrəmanlıqlar olub. Bu qəhrəmanlıqların heç biri hər il və bu cür yüz milyonlar tərəfindən yaşadılmır. Kərbəla hadisəsi bəşər tarixində nəhəng yer tutan vücudi hadisələrdəndir. Onların yekun nöqtəsini qoyan hadisədir. Ona görə də, əsrlərdir yaşanır. Həzrət Adəmdən (ə) başlayaraq bir çox peyğəmbərlərlə (ə) bağlı bəşəriyyət xüsusi hadisələri xatırlayır. Bu hadisələrin hamısı insanların daxilindəki ruhiyyə ilə bağlı olan məsələlərdir. İmam Hüseynin (ə) Aşura məktəbinin bu cür yaşanmasının əsas səbəbi budur ki, bu hərəkatın ali hədəfi fövqəl dərəcədə mübarək olub və özündən əvvəlki bütün mübarək hərəkatların nöqtəsini qoyub“.
Xətib daha sonra Əba Əbdillahın (ə) Aşura qiyamının hədəflərini qeyd etdi: “Aşuranın ilk və ən zəruri hədəfi – İslamın din olaraq əhyası, diri saxlanmasıdır. İslam dininin diri olaraq mövcudiyyətini sığortalamaqdır. Kərbəla məktəbini hər mənada dəyərləndirən mütəxəssislər bu fikirdədirlər ki, Aşura o fenomenlərdəndir ki, onun bir neçə mahiyyəti, qatı, mövzusu var. Bu ən önəmli mövzulardan da biri – İmtinadır. İmtina fəlsəfəsi Kərbəla məktəbinin aparıcı dərslərindəndir. Əba Əbdillah (ə) ilk dəfə Yezidə (lən) beyət etməkdən imtina etməklə, bəşəriyyətə imtina dərsi keçir“.
ütbənin yekununda Hacı İlqar Məhərrəm ayının birinci günündə baş verən hadisələrə, Əba Əbdillahın (ə) Kərbəlaya gəlişinə toxunub, zikri-müsibət söyləyib.
Tədbir rövzə və mərsiyələrin oxunması ilə davam edib. “Əhli-beyt (ə) aşiqləri” dini-yaradıcılıq qrupunun ifasında mərsiyələr səsləndirilmiş, əzadarlıq mərasimi keçirilmişdir.
Məclis, cəmlə “Fərəc” duasının oxunması ilə yekunlaşmışdır.
