İsrail prezidenti İshaq Hersoq martın 9-10-da Türkiyəyə səfər edəcəyini açıqlayıb. İsrail Rəyasət Heyətindən verilən açıqlamaya görə, Hersoq Türkiyə prezidenti Rəcəb Tayyib Ərdoğanın dəvəti ilə həyat yoldaşı Mişel Hersoqla Ankaraya rəsmi səfər edəcək. Beştepədəki Prezident Külliyəsində dövlət mərasimi ilə qarşılanacaq Hersoq prezident Ərdoğanla görüşəcək. İsrail Baş Nazirlik və Xarici İşlər Nazirliyi ofislərinin koordinasiyası ilə təşkil ediləcəyi bildirilən səfər zamanı iki lider müxtəlif ikitərəfli məsələləri, o cümlədən İsrail-Türkiyə münasibətlərini, iki dövlət arasında əməkdaşlığın genişləndirilməsi potensialını müzakirə edəcəklər.