Erməni Milli Konqresinin (Levon Ter Petrosyanın Partiyası – red) üzvü Zoya Tadevosyan jurnalistlərlə görüşü zamanı bəyanatla çıxış edərək bildirib ki, münaqişənin həlli üçün tələb olunarsa, işğal olunmuş Dağlıq Qarabağın ətrafındakı 7 rayon qaytarılmalıdır.
FaktXeber.com-un məlumatına görə, Z.Tadevosyan bəyan edib ki, Qarabağ müharibəsi zamanı «azad edilmiş» ərazilər Dağlıq Qarabağa aid deyil.
«Biz bu əraziləri azad olunmuş adlandırırıq. Amma bu auditoriyada hamı yaxşı bilir ki, (sözügedən torpaqlar) ələ keçirilmiş ərazilərdir», – deyəo, vurğulayıb.
Jurnalistin «ələ keçirilmiş ərazilər» deyərkən nəyi nəzərdə tutduğu barədə sualına isə Zoya Tadevosyan sualla cavab verib: «Bəyəm oralar erməni torpağıdır?»
Ardınca «Hesab edirsinizmi ki, torpaqlar qaytarılmalıdır», sualına Zoya Tadevosyan belə bəyan edib:
«Heç kəs məndən inciməsin, ancaq buna mən qərar vermirəm. Bu məsələ həmişə həmsədrlər tərəfindən qoyulub və ümumiyyətlə danışıqlar masasında müzakirə olunub. Hörmətli jurnalist, məndən incimək və məsul olmadığım nəyisə məndən tələb etmək lazım deyil. Əgər məsələ torpaqların qaytarılması yolu ilə həll olunacaqsa, bu, əlbəttə doğrudur. Əgər tərəflər məsələni bu yolla həlli barədə razılığa gələcəksə, o zaman…»
Ermənistan tərəfinin bu torpaqları «ələ keçirilmiş» yox, «azad edilmiş» hesab etdiyi barədə iradına isə Tadevosyan bəyan edib ki, bu, erməni tərəfinin mövqeyidir: Benəlxlq İctimaiyyət isə bu əraziləri ələ keçirilmiş və ya işğal edilmiş kimi qəbul edir.
