Yerli KİV-lərin məlumatına görə, Biləsuvar İH-in başçısı digər insanlara məxsus minlərlə hektar ərazini mənimsəyib. Mahir Quliyev mənimsədiyi torpaqlarda qarpız və sarımsaq yetişdirib. Bununla yanaşı, onun müavinləri tərəfindən də hektarlarla sahə mənimsənilib.
Bundan əlavə, qeyd olunur ki, Mahir Quliyev münbit torpaqları dostlarına və yaxın silahdaşlarına paylayıb. Bəzi əraziləri isə rayon başçısı bir oliqarxa və daha bir neçə sahibkara satıb.
Həm də iddia olunur ki, yerli iş adamları daima rayon rəhbərinin təzyiqi altında olublar. Rayondakı az-çox perspektivli iş növləri dərhal Mahir Quliyev və onun əlaltıları tərəfindən nəzarət altına alınıb. İcra başçısı, həmçinin yerli sahibkarları ərazinin abadlaşdırılması işində iştirak etməyə məcbur edib. Onların hər birinə öz vəsaiti hesabına abadlaşdırmalı olduğu ərazi ayrılıb. Virtualaz-ın verdiyi xəbərə görə, rayon rəhbərinin tələblərini yerinə yetirməkdən imtina edən hər kəs dərhal elə bir təzyiqə məruz qalıb ki, obyektlərini satıb Biləsuvar rayonunu tərk etməyə məcbur olub.
Dövlət tərəfindən ayrılan sosial yardımın həqiqətən ehtiyacı olan və aztəminatlı ailələrə çatmadığı da bildirilir. Bu yardım yüksək vəzifəli şəxslərin yaxınlarının adlarına sənədləşdirilib və rayon rəhbərliyi tərəfindən mənimsənilib.
O da bildirilir ki, Xırmandalı kəndindəki Mahmudçala və Cərcili adlı ərazilərdə qanunsuz olaraq balıq yetişdirmək üçün çoxsaylı süni su anbarları yaradılıb. Ümumi sahəsi 500 hektar olan ərazidə sahibkarlar balıq yetişdiriblər və onların əsas ortağı rayonun başçısı Mahir Quliyev olub.
Bu süni gölməçələrin ətrafındakı qanunsuz hərəkətlər səbəbindən duz bataqlıqları əmələ gəlməyə başlayıb və münbit kənd təsərrüfatı əraziləri yararsız hala düşüb. Süni su gölməçələrinin yayda daim su ilə təmin edilməsi səbəbindən ərazidə ciddi su qıtlığı yaranıb. Belə ki, rayon rəhbərinin balıqçılıq biznesi ilə əlaqədar rayon sakinlərinin əkin sahələri susuz qalıb.
Ərazidə su çatışmazlığının başqa bir səbəbi, ümumi sahəsi 1,5 min hektar olan torpaq sahələrini su ilə təmin edən kanalın dağıdılması olub. Kanalın keçdiyi torpaq sahələri isə yerli məmurların mülkiyyətinə verilib.
Mahir Quliyevi ölkə başçısı “Vətənə xidmətə görə” ordeni ilə mükafatlandırıb.
Qeyd edək ki, Mahir Hacı oğlu Quliyev 28 noyabr 1958-ci ildə Kəlbəcər rayonunda anadan olub. 2000-ci ildə Naxçıvan özəl Universitetinin diplomunu alıb.
1977-1979-cu illərdə sovet ordu sıralarında hərbi xidmətdə olub.
Əmək fəaliyyətinə 1975-1977-ci illərdə Kəlbəcər rayon kolxoz tikinti idarəsində fəhlə kimi başlayıb. Hərbi xidmətdən qayıtdıqdan sonra 1980-1981-ci illərdə “Azərnəqliyyat” tikinti trestində fəhlə, 1981-2005-ci illərdə isə o zamankı “26 Bakı komissarı”, indiki Səbail rayonun ictimai iaşə idarəsi nəzdində olan restoranda ofsiant işləyib.
2005-ci ildə Səbail bələdiyyəsinin üzvü və 8 sentyabr 2006-cı il tarixədək bələdiyyə sədrinin müavini vəzifəsini tutub. Həmin gündən 26 aprel 2011-ci ilədək Astara Rayon İcra Hakimiyyətinin başçısı vəzifəsində işləyib.
Mahir Quliyev 26 aprel 2011-ci ildə Biləsuvar Rayon İcra Hakimiyyətinin başçısı vəzifəsinə təyin edilib. O, YAP-ın üzvüdür. 3 övladı var.
