Biz Elşad İsgəndərova suallarımızı hüquqla ünvanlayırıq.
“Cəmiyyətdə sosial ədalətsizliyə yol verməmək üçün Azərbaycan məktəblərində vahid məktəbli formasına keçilib. Bu proses əslində yetkinlik yaşına çatmayan uşaqların dini etiqad azadlığını qoruyur. Hər bir uşağın gələcəkdə istədiyi dini və ona uyğun yaşam tərzini şüurlu şəkildə seçmək hüququ var. Məsələni “hicab problemi” kimi qabardan şəxslər və qruplar sözügedən ailələrin, valideyn və uşaqların yaşadıqları problemin çözülməsi məqsədini güdmür və onun sivil yolla həllinə də yardım etmirlər. Onların amacı dini siyasiləşdirmək, dövlətlə dindarlar arasında uçurum yaratmaqdır və özlərinin siyasi məqsədlərinə nail olmaqdır. Bizə daxil olan məlumatlar da bunu təsdiqləyir”, – deyə komitə sədri bildirir.
Azərbaycan Respublikasının Qoşulduğu “Uşaq Hüquqları haqqında” Konvensiyanın 14-cü maddəsi:
1. İştirakçı dövlətlər uşağın fikir, vicdan və din azadlığına hörmət bəsləyirlər.
2. İştirakçı dövlətlər valideynlərin və müvafiq hallarda qanuni qəyyumların uşağın hüququnun həyata keçirilməsində uşağa onun inkişaf etməkdə olan qabiliyyəti ilə uzlaşan metodlarla rəhbərlik etmək hüquqlarına və vəzifələrinə hörmət bəsləyirlər.
***
Öz dininə və ya məzhəbinə etiqad etmək azadlığına yalnız elə məhdudiyyətlər qoyula bilər ki, onlar qanunla müəyyən edilmişdir və dövlət təhlükəsizliyinin, ictimai qaydanın, əhalinin mənəviyyatının və sağlamlığının qorunması və ya digər şəxslərin əsas hüquq və azadlıqlarının müdafiəsi üçün zəruridir.
Sual: Hicaba qanunla qadağa qoyulubmu? O, hansı qanundur?
“Uşaq Hüquqları haqqında” Konvensiya, maddə 29 .
1.İştirakçı dövlətlər razılaşırlar ki, uşağın təhsili aşağıdakılara yönəldilməlidir:
a) uşağın şəxsiyyətinin, istedadının, əqli və fiziki qabiliyyətinin ən tam həcmdə inkişaf etdirilməsinə;
b) insan hüquqlarına və əsas azadlıqlara, habelə Birləşmiş Millətlər Təşkilatının Nizamnaməsində bəyan olunmuş prinsiplərə hörmətin tərbiyə edilməsinə;
c) uşağın valideynlərinə, onun mədəni özgünlüyünə, dilinə və dəyərlərinə, uşağın yaşadığı ölkənin və mənşəcə olduğu ölkənin milli dəyərlərinə, öz sivilizasiyasından fərqlənən sivilizasiyalara hörmətin tərbiyə edilməsinə;
d) anlaşma, sülh, dözümlük, kişilərlə qadınların hüquq bərabərliyi və bütün xalqlar, etnik, milli və dini qruplar arasında, habelə yerli əhali sırasından olan şəxslər arasında dostluq ruhunda uşağın azad cəmiyyətdə şüurlu həyata hazırlanmasına;
Cənab İsgəndərov, bu normalara əməl olunurmu? Hicab qadağası bu normaların pozulması demək deyilmi? Dövlət bu yazılanlara niyə əməl etmir?
“Uşaq Hüquqları haqqında” Azərbaycan Respublikası Qanunun 14-cü maddəsi:
– Hər bir uşağın vicdan, fikir və söz azadlığı vardır. Valideynlər, digər şəxslər və dövlət orqanları uşağın vicdan, fikir və söz azadlığına hörmətlə yanaşmalıdırlar. Uşağın səhhətinə zərərli təsir göstərən dini ayinlərin icrasına cəlb edilməsi qadağandır.
Hicab dini ayin olaraq uşağın səhhətinə zərərli təsir göstərirmi? Cənab İsgəndərov, buna nə deyirsiniz.
Mürtəd kimdir?
Dini baxımdan 9 yaşından qız uşaqlarının hicab bağlamaları fərzdir. Sizin açıqlaramaranız birbaşa Allahın əmrinə ziddir. Dini ayinlərdən olan hicabın əleyhinə çıxmaq İslam nöqteyi nəzərdən dindən çıxmaq hesab olunur. Siz elə düşünürsünüz ki, yalnız Əkrəm Əylislini mürtəd elan edə birəsiniz? Halbuki, Əkrəm Əylisli “qəhrəmanının” vasitəsi ilə öz fikirlərini qələmə almışdır, bu rejim isə əməli hərəkətləri ilə özünü mürtəd etmişdir. Özünüzə lazım olanda dindən siyasi alət kimi istifadə edirsiniz, kənara isə dini siyasiləşdirməyin deyirsiniz. Özünüzə lazım olan, siyasi oponentləri vurmaq üçün “donuz əti haramdır” bildirib, hicaba gəlincə dünyəvi dövlət adı ilə kənara durursunuz. Bunu hara yazaq, cənab İsgəndərov?
Bizə olan nifrətinizn səbəbini bilirik
Rejim tərəfindən Sizə tapşırılan missiyanı yerinə yetirilməsinə imkan vermədik. Missiya ondan ibarət idi ki, bir neçə ildir, rejimin yırtılmış dini maskasını bərpa etməyə imkan vermədik və imkan verməyəcəyik inşallah. Bizi həbs etməklə yırtılmış maskaların rahatlıqla tikilməsini güman eitməyin.
Dindən kim alət kimi istifadə edir?
Həqiqətdə təmsil etdiyiniz rejim dindən alət kimi istifadə edir. Bir cümlə ilə sözümü sübuta yetiririəm. “Donuz əti yemək haram”, “qumar oynamaq, şərab içmək, xalqın malını talan etmək halaldır”.
Sizə, cənab İsgəndərov, Həzrət Əlinin Nəhcul Bəlağada dövlət ayinlərinin icrası mövzusunda olan “Malik ibn Əştərə” olan Əhdnaməsini oxumağı tövsiyə edirəm. Onu da qeyd edim ki, dinin siyasətdən ayrı olması fikrinin kökündə zalım rejimlərin, qəsbkar insanların öz hökmranlığını saxlamaq niyyəti dayanır. Çünki dinin siyasəti birinci növbədə cəmiyyətdə ədalətin bərqərar olması, insanların hüquqlarının bərabər şəkildə qorunması, zülmün kökünün kəsilməsi və s.-dir.
Hicablı bacılarımdan üzr istəyirəm
Siz iki ildən çoxdur ki, konstitusiyaon hüquqlarından məhrum olan hicablı bacılarımızdan və onların valideynlərindən üzr istəmək əvəzinə onlara “müdrik” kimi müraciət edib dindən çıxmağı təklif edirsiniz ki: “Uşaqları hicabsız məktəblərə buraxın”. Özümün və zindanda olan qardaşlarımın adından hicablı bacılarımızdan bu problemi indiyə qədər həll edə bilmədiyimizə görə üzr istəyirəm və əmin edirəm ki, pozulmuş hüquqlarımız mütləq bərpa olunacaq.
Hacı Tale Bağırzadə
Kürdəxanı, istintaq təcridxanası
