Əliyevlərin cinayət məsuliyyətinə cəlb olunması haqda suala İbrahimbəyov necə cavab verib?
Azərbaycanda oktyabrda keçiriləcək prezident seçkiləri artıq indidən dünyanın diqqət mərkəzindədir. Təsadüfi deyil ki, dünyanın ən nüfuzlu media orqanları tez-tez bu mövzuda materiallar hazırlayır.
Əvvəllər bu materiallar bir qayda olaraq, ölkədə avtoritar rejimin hökm sürməsi, insan haqları sahəsindəki acınacaqlı durum barədə olurdusa, son vaxtlar beynəlxalq media müxalifətin prezidenliyə vahid namizədi Rüstəm Ibrahimbəyova xüsusi diqqət yetirir. Bu qəbildən olan növbəti materialı dünyanın ən nüfuzlu mətbu orqanlarından olan Ingiltərənin “The Independent” qəzeti hazırlayıb.
Müəllif Şon Uokerin hazırladığı məqalə “Rejissor diktatora qarşı…” başlığıyla dərc olunub.
“74 yaşlı rejissor və ssenarist Rüstəm Ibrahimbəyov heç vaxt siyasətlə məşğul olmayıb. Amma məhz o, Azərbaycanda müxalifətin prezidentliyə vahid namizədi oldu”, – deyə Şon Uoker yazır.
Məqalədə qeyd olunur ki, əməkdar kino xadimi Ibrahimbəyov ölkənin hazırkı rəhbəri – despot Ilham Əliyevlə rəqabət aparacaq:
“2003-cü ildə atası Heydər Əliyevin ölümündən sonra ölkənin idarəçilik sükanını ələ alan Ilham Əliyev üçüncü müddətə prezident olmaq üçün məqsədli şəkildə Konstitusiyanı dəyişdi.
Neftdən əldə olunan gəlirlər ona paytaxt Bakını Xəzəryanı Dubaya çevirmək imkanı yaradıb. Eyni zamanda, onun ailə üzvləri və digər yaxın adamlarının adları nəhəng korrupsiya skandallarında hallanır”.
Müəllif onu da qeyd edir ki, Bakıda neft ehtiyatlarını nəzərə alan Qərb bu ölkədə hakim elitanın korrupsiya əməllərinə göz yumur. Ölkə daxilində isə hədə-qorxu və KIV üzərində nəzarət yoluyla intellektual gənc etirazçıların dairəsi daraldılır.
“Independent” yazır ki, Ibrahimbəyovu nə xarizmatik natiq, nə də rejimin çoxdankı tənqidçisi adlandırmaq olar: “Keçmişdə Ibrahimbəyovun Əliyevlərlə yaxın münasibətləri olub. O, uzun illər əvvəldən Azərbaycan mədəniyyətində ən tanınmış fiqurlardan biridir. ”Səhranın bəyaz günəşi” filmini məhz o çəkib. Bundan başqa, 1994-cü ildə “Oskar”a layiq görülən “Günəşdən usanmışlar” filminin ssenari müəllifi də Ibrahimbəyovdur.
Ibrahimbəyov etiraf edir ki, oğul Əliyev hakimiyyəti atasından miras alanda onun özü, eləcə də digər mədəniyyət xadimləri seviniblər ki, ölkəni “gənc, perspektivli siyasətçi idarə edəcək”. Amma 2007-ci ildə artıq oğul Əliyevin idarəçiliyində avtoritarizmə meyl açıq-aşkar hiss olunub.
Azərbaycanda Ibrahimbəyova müxalifəti birləşdirməyə qadir olan keçid fiqur kimi yanaşılır. Rejissor iki il hakimiyyətdə olmağı, bu müddətdə azad, şəffaf parlament seçkisi keçirməyi və Konstitusiyada dəyişikliklər etməyi, Azərbaycanı parlament respublikasına çevirməyi vəd edir.
Müxalifətin vahid namizədi eyni zamanda, Vətənində həbs olunacağını, hətta öldürülə biləcəyini istisna etmir. Bu səbəbdən də beynəlxalq ictimaiyyətin dəstəyini əldə etməyə çalışır. Son vaxtlar o, ABŞ Dövlət Departamentinin vəzifəli şəxsləri və Avropa Ittifaqının xarici işlər və təhlükəsizlik məsələləri üzrə ali komissarı Ketrin Eştonla görüşüb.
Ibrahimbəyov “Seçkidə qələbə qazanacağınız halda, Əliyev və onun ailə üzvləri cinayət məsuliyyətinə cəlb olunacaqmı?” sualına cavab verməkdən yayınıb: “Mən təqib tərəfdarı deyiləm və qan tökülməsinin də qəti əleyhinəyəm. Amma xalqdan oğurlanmış pulların geri qaytarılması üçün hansısa addımlar atılacaq”.
Rejissor əmindir ki, hakimiyyət müxalifətə basqıları daha da artırsa və seçkini açıq-aşkar saxtalaşdırsa, bu, ölkədə partlayışa gətirib çıxaracaq: “Puşkin yazırdı ki, mənasız və amansız rus üsyanından dəhşətli heç nə yoxdur. Amma Puşkin Azərbaycandakı üsyanı görməyib…”(azadlıq)
