Tarix boyu düşmənlər tərəfindən din və İslam camiəsinə qarşı bir çox təhlükələr yönəlmişdir. Müsəlmanlar yalnız elmə və elm öyrənib-öyrətməyə əhəmiyyət verdikləri zaman düşmənə qələbə çala bildilər. Müsəlmanlar cəhalət və nadanlıq içərisində olduqda məğlubiyyətə uğradılar.
İslam aləminin xanımı həzrət Zəhranın (ə) ənənəsində elmə və elmin təliminə dəyər hər şeydən çox özünü göstərən bir məsələ olmuşdur.
Ayə
“Heç bilənlərlə bilməyənlər (alimlə cahil) eyni ola bilərmi?!”
(“Zumər” surəsi, ayə 9)
Hədis
Allahın rəsulu (s) buyurub: “Öyrənməyin bir saatliq çətinliyinə səbr etməyən kimsə nadanliğin həmişəlik zillətində qalacaq.”
(“Mizanul-hikmət”, c. 3, səh. 2070)
Ənənə
– O dinsiz və inadkar düşmən qadınla mübahisənizin axırı nə oldu?
– Çox sevinirəm. Peyğəmbərin (s) qızı o məsələdə bizim mübahisəmizi eşitdikdə mənim sözümdəki dəlil və sübutları təsdiq etdi. Mənim üzümdə sevinci gördükdə buyurdu: “Səndən daha çox Allahın mələkləri sevindi və o düşmən qadının qəm-qüssəsindən çox şeytanın qəm-qüssəsi artdı.”
İmam Həsən (ə) bu məsələyə toxunaraq buyurur: “Allah Öz mələklərinə əmr etdi: Hər alim öz elmi ilə inadkar düşmənə qalib gəlmək üçün bir möminə kömək etsə, onun savabını min-min bərabər yazın.”
(“Biharul-ənvar”, c. 2, səh. 8)
Hekayə
İki övladı Birinci Dünya Müharibəsində həlak olmuşdu. Üç gün idi ki, vəziyyətini nəzərə alıb dərs vermək üçün onun yanına getmirdim.
Dördüncü gün Əmin[1] xanım bir nəfəri mənim yanıma göndərərək dərsi davam etdirməyi istədi. Onun evinə daxil olduqda narahat halda soruşdu:
– Dayı! Nə üçün dərsi dayandırmısan?
Dedim: – Övladlarınız təzə vəfat edib. Sizin vəziyyətinizi nəzərə alıb dərsi dayandırdım.
Bir anlıq sükutdan sonra dedi:
– Mən də Allahdan utanıram ki, üç gündür heç nə öyrənməmişəm. Allah övladları Özü mənə vermişdi və Özü də aldı.
(Ustadı Seyid Məhəmməd Əli Nəcəfabadinin dilindən müctəhid xanım Əminlə bağlı xatirə)
[1] Əmin xanım 1308-ci ildə İsfahanda dünyaya gəlib. O, böyük ustadların nəzarəti ilə müctəhid, alim və fəzilətli qadınlardan olmuşdur. Əmin xanım öz əsrinin böyük fiqh, üsul, təfsir, fəlsəfə və irfan ustadlarından sayılırdı.
