“Maarifçiliyə Dəvət” İB-nin üzvlərinin Nardaranda əza məclisinə polis müdaxilə edib – Fotolar
Əhli-beyt (ə) sevərlər Vətəni olan Azərbaycan növbəti Məhərrəm-səfər əyyamını yaşayır. Hələ Məhərrəmlik ayının ilk günlərindən vətənimizin hər bir güşəsində İmam Hüseynin (ə) və qəhrəman məsləkdaşlarının Kərbəlada şəhid olmasının anım mərasimləri keçirilir.
Bu gün isə şəhidlər sərvəri, Əhli-beytin (ə) 3-cü imamı İmam Hüseyn ibni Əlinin (ə) və Kərbəla şəhidlərinin şəhadətindən 3 gün ötür. Bu münasibət ilə inanclı şəxslər müxtəlif vasitələrlə öz ehtiramlarını və başsağlığını bildirirlər.
“Maarifçiliyə Dəvət” İctimai Birliyin sədri ilahiyyatçı Elçin Manafov və birliyin 40-a yaxın üzvü bu gün Nardaranda yerləşən Rəhimə xanımı ziyarət ediblər. Bir neçə bölgədən əzadarlıq niyyəti ilə paytaxta təşrif buyuran inanclı insanlar ziyarətgaha daxil olublar. Təşkilatçı E.Manafov əzadarlara Kərbəla hadisələrindən bəhs edib. Daha sonra onlar mərsiyə demək istəsələr də, buna ziyarətgahda çalışanlar və əraziyə nəzarət edən polis əməkdaşları icazə verməyib. Ziyarətçilərin xahişinə baxmayaraq qətiyyətlə “buna izn yoxdur, bizə belə tapşırılıb”– deyə cavab veriblər. Birliyin üzvləri onlara bu cür davranışın doğru olmadığını, bu onların dini dəyərləri olduğunu bildiriblər. Eyni zamanda buna icazə verməməyin doğru olmadığına özlərinin etirazını bildiriblər. Polis əməkdaşlarından səbəb soruşduqda isə “göstəriş budur” – deyilib. Beləliklə əzadarlar ziyarətlərini yarımçıq sonlandırıblar.
Baş verənlərə “Maarifçiliyə Dəvət” İctimai Birliyin” sədri Elçin Manafov Hədəf14.az-a öz münasibətini bildirib. İlahiyyatçı bildirib ki, bildiyiniz kimi bu gün imam Hüseynin (ə) şəhadətinin 3-cü günüdür. “Bu məqsədlə bir neçə nümayəndə və tərəfdarlarımız ilə birgə Nardarana yollandıq ki, bu mərasimi müqəddəs Rəhimə xanım ziyarətində icra edək. Bundan öncə də Aşura mərasimini adıçəkilən ziyarətgahda qeyd edək. Lakin bizə bildirildi ki, bu mərasimi yanlız yerli kənd əhalisi edə bilər. Kənar şəxslərin bundan məhrum olduğunu öyrəndiyimiz üçün düşündük ki, imamın 3 mərasimini qeyd edərik. Məhz ziyarətə də bu məqsədlə gəlmişdik. Lakin təəssüflər olsun ki, əzadarlığımızın qarşısı polis əməkdaşları tərəfindən alındı”
Ilahiyyatçı onu da qeyd edib ki, onlara bu cür mərasimləri ancaq Nardaran sakinləri edə biləcəyi deyilib. “Bu cür ayrı seçkilik bizi çox məyus etdi. Havanın bu cür küləkli və yağışlı olmasına baxmayaraq o insanları paytaxta qəlblərində olan Hüseyn (ə) eşqi gətirmişdi. Böyük sevgi ilə gələn əzadarlara dini ayinlərini yerinə yetirməyə maneə olmaq düz addım deyil. Hər kəs böyük üzgünlük və heyrət içərisində ziyarətgahı tərk etdilər. Ümid edirik bu cür hərəkətlər bundan sonra təkrar olunmaz. Çünki illərdir rəhimə xanım ziyarətgahı Əhlibeyt sevərlərin dərd ortağı, müqəddəs məkanı olub. Yüzlərlə insan Əhlibeytin istər xoş, istər acılı günlərində Rəhimə xanım (ə) ziyarətgahına axın edib dualar oxunub, əzadarlıq edilib və ehsanlar verilib. Bu insanların dini dəyərləridir”.
